سياسة الشراء وحقوق المشتري

حقوق وواجبات المشتري قبل وبعد البيع

#إحنا غير أي صفحة على النت...#إذا مش مستعد تعرف عنا وتقرأ تعليماتنا...#ما_تشتري_منا

💯 زي ما بتقرأ تعليمات أي جهاز بدك تشتريه أو مكونات صنف غذائي معين... واجب عليك تقرأ تعليمات الصفحة والناس الي رح تتعامل معاهم ✌️

🔴🔴 الغرض من هذه التعليمات تنبيه المسلمين على أكثر المشكلات التي تواجهنا كمتجر أون لاين وتفادي الوقوع فيها عملا بقوله ﷺ: ( إنما الدين النصيحة)... وقوله ( البيعان بالخيار ما لم يتفرقا، فإن صدقا وبينا بورك لهما في بيعهما، وإن كتما وكذبا محقت بركة بيعهما)

1️⃣ قبل اختيار الطلب

أهم نقطة في هذا باب هو مقاس الطقم او الموديل الي ناوية تشتريه...
✅️ إحنا بنكتب كل تفاصيل الموديل ومقاسه بال cm ... وكل موديلاتنا مقاس واحد فري سايز وبنجربها على أكثر من جسم لحتى نشوف إيش أكبر مقاس ممكن يستوعبه الطقم بدون ما يبرز مفاتن الجسم ولا يكون متبرج....
✅️ لذلك... إذا كان وزنك 50 وطلبتي طقم بيلبس لحد ١٠٠كيلو أو ١٤٠كيلو فشي طبيعي يكون كبير وبدك تكوني متعودة على الفضفاض... وإحنا بنحرص دايما إنه نسأل الاخوات عن وزنهم وطولهم مشان ننصحهم قبل البيع مش مشان نعطيهم على مقاسهم ... لانه هدفنا نشر اللباس الشرعي وليس الاعانة على التبرج....
✅️ دائما بنحرص إنا نصور الموديلات بنفسنا وبنخبر الزبونة بوزن وطول العارضة مشان تشوف كيف رح يطلع عليها وتقارن نفسها بالعارضة....
✅️ كل ما سبق بنعمله لأن البيع أون لاين... يعني إحنا مش شايفينك ولا عارفين حجمك ولا طريقة لبسك... وما بنطلع أي طلب إلا نتأكد إنك فاهمة تماما شو رح يوصلك....

2️⃣ قبل تثبيت الطلب

إحنا صفحة دعوية، يعني لا عنا موظفين ولا مندوبين ولا محل ولا حدا يساعدنا في تجهيز الطلبات... وأرباحنا رمزية جدا لا تتعدى 5% من تكلفة القطعة... وأي طلب بستغرق معنا حوالي ربع ساعة تجهيز.
✅️ بنتأكد من القطعة قدر المستطاع وبنصفطها تصفيط مرتب...
✅️ بنكتب فاتورة ملونة فيها تفاصيل العميل وطلبه...
✅️ بنحط الطلب بكيس صفحتنا الأبيض الي عليه شعارنا...
✅️ بنكبس الكيس بطريقة محكمة مشان ما يضيع الطلب مع شركة التوصيل....
❌️ لذلك لا نحل لأحد أن يطلب الطلب بنية إنه بس بده يشوفه ويقيسه ويرجعه...
❌️ أو يكون طالب أكثر من موديل ولون مشان يشوف شو المناسب اله ويرجع الباقي
❌️ أو ما يكون جدي في طلبه ويرجع يلغيه بعد ما نجهزله اياه
✅️ لذلك وضعنا شرط للي بده يرجع أي قطعة مع المندوب إنه يدفع دينار خدمة تعويضا لتعبنا ووقتنا....

3️⃣ بعد تثبيت الطلب وقبل الإستلام

✅️ يرجى قراءة منشورنا السابق (🔴 إرشادات في التعامل مع مندوب التوصيلات 🔴 ) والهدف منه معرفة ما لك وما عليك بالنسبة للتوصيل وإنك ما تدفعنا أجرة التوصيل بغير وجه حق...
✅️ أكثر نقطة حساسة هي إلغاء الطلب بعد تجهيزه أو بعد إرساله مع مندوب التوصيل وأصحاب هذه الحالة غالبا ما ينتهي بهم الأمر إلى الحظر من قبلنا أو عدم تثبيت طلباتهم المستقبلية إلا إذا تم ارسال قيمتها على المحفظة... عملا بقوله ﷺ ( لا يلدغ المؤمن من جحر واحد مرتين)...
✅️ عدم الرد على مندوب التوصيل أو تأجيل الطلب لعدة أيام ثم رفض إستلامه يعرض صاحبه للحظر أيضا....

4️⃣ عند إستلام الطلب وقبل مغادرة المندوب

✅️ لازم تتأكدي من طلبك كاملا بما فيه عدد القطع والالوان المطلوبة...
✅️ إذا رح ترجعي أي شي مع المندوب بعد ما فتحتيه وفردتيه، واجب عليكي ترجعي تصفطيه زي ما كان وترجعي تسكري الكيس الي إجا فيه بإحكام... لان الملابس بطريق الرجعة بتلم وبر وغبرة وروائح وأكيد ما بترضي يوصلك طلبك بهذا الشكل.... لذلك رجعيه زي ما وصلك وإتق الله فينا...
✅️ سابقا كان عنا خدمة المعاينة في البيت والقياس، لكنا لغيناها بسبب تصرفات الكثير والله المستعان.... الان المعاينة أمام المندوب فقط وما في خدمة قياس... وهذا الكلام بنخبره لكل الي بطلبوا منا مشان يقرروا بدهم يثبتوا الطلب أو لأ....
✅️ ️قراءة منشورنا (🔴 إرشادات في التعامل مع مندوب التوصيلات 🔴)

5️⃣ خدمة ما بعد البيع

إحنا الوحيدين الي عنا خدمة التبديل أو الترجيع وبنقبل أي عذر لأن الأصل في المسلم الصدق، وهذا إنطلاقا من أخلاقنا كمسلمين وتعاملنا مع الجميع كإخوة لنا في الله...
✅️ أي تبديل أو ترجيع لازم يصير خلال 24 ساعة من وقت الإستلام... يعني إذا وصلك طلبك الظهر أو العصر لازم تبلغينا بنفس اليوم قبل العشاء مشان نعمل اللازم... لأن البديل بده لليوم الثاني لحتى يوصلك....
✅️ قمنا بإضافة دينار خدمة للي بدها ترجع أو تبدل... بالإضافة الى دينارين توصيل مرة أخرى لأن المندوب رح يرجعلك وبده حسابه... يعني بالمختصر إذا بدك ترجعي أي طلب رح تخسري 5 دنانير: دينارين توصيل أول مرة، دينارين توصيل ثاني مرة ودينار خدمة... لذلك انتبهي منيح على شو بتوصي واتبعي التعليمات...
✅️ بناءا على ما سبق يتم رفض أي طلبات ترجيع أو تبديل متأخرة....
✅️ طلب الترجيع إذا كان مبني على الطعن في مصداقيتنا وسوء الظن بنا أو إتهامنا بالغش يعرض صاحبه للحظر ولن نسامحه أمام الله يوم القيامة... لأننا فاتحين صفحة لخدمة الاسلام والمسلمين مش مشان نضحك عليك ونأكل مالك بالباطل....

🔴🔴 ختاما: كل الحالات السابقة نتعرض لها تقريبا بشكل يومي وهذه خلاصة خبرتنا مع طلبات الأون لاين... والله ولي التوفيق...

رابط منشور حقوق وواجبات المشتري قبل وبعد البيع